Ахсынньы 19 күнүгэр, Аҕа дойду Улуу Кыайыы 80 сылынан, бүтүн Россияҕа герой күнүн чэрчитинэн Одьулуун нэһилиэгиттэн Анал байыаннай дьайыыга ыҥырыллан барбыт буойуттарбытыгар ону тэҥэ байыаннай дьайыы бэтэрээннэригэр аналлаах СТЕЛА аһыллыыта буолла. 

Стеланы арыйдылар Одьулуун нэһилиэгэ Тыа сирин түөлбэтин баһылыга  Ефремова Людмила Васильевна, Улуус баһылыгын тутууга солбуйааччы Дьячковский Афанасий Николаевич уонна анал байыаннай дьайыыга сылдьар буойун уолаттарбыт дьиэ кэргэттэрэ. Байыаннай дьайыы бэтэрээннэригэр Бочуотунай грамоталар, стеланы оҥорон таһаарбыт дьоммутугар махтал суруктар туттарыллыннылар. 

Герой күнэ өспөтүн!

Үгүс үйүлэргэ сылларга!

Аан дойдуга Эйэ эрэ!

Чэчирээтин чэлгийдин!

Кэлбит дьоммутугар барҕа махталбытын тиэрдэбит! Бука - бары дьоллоох, доруобай буолуоҕуҥ!  

Ахсынньы 5 күнүгэр Уус Алдан улууһугар, Тойон Мүрү култуура дыбарыаһыгар 47 төгүлүн ыытыллар Өрөспүүбүлүкэтээҕи Мария, Аким Бурцевтар сырдык ааттарыгар аналлаах «МҮРҮ 2025» ырыа куттаах дьиэ - кэргэн күрэҕэр, Одьулуун нэһилиэгин ырыа куттаах Абрамовтар дьиэ - кэргэттэрэ кыттыыны ыллылар. Матрена Дмитриевна, Илларион Илларионович уонна кыргыттара Варя Винокурова, Алима Егорова.

Өрөспүүбүлүкэ ырыа куттаах 14 дьиэ - кэргэн кыттыыны ылла. Абрамовтар Дипломант III степени, Мария, Аким Бурцевтар оҕолоро туруорбут харчынан бириэмийэлэрин ыллылар.  

Ахсынньы ый 5 күнүгэр, Дьокуускай куоракка «СИТИҺИИ» Республикатааҕы  декоративно - прикладной норуот маастардарын куонкуруһугар Т.Г. Тоскин аат. «Сайдыс» НАДь иһинэн үлэлиир Артемьева Елена Дмитрьевна салайааччылаах, «Иэйэхсит» норуот маастардарын түмсүүтэ ситиһиитээхтик кыттан кэллэ.

Куонкурус бастакы этаба эрдэ бэриллибит балаһыанньанан маастардарбыт үлэлэрин презентационнай матырыйаал оҥорон, хомуйан, билиҥҥи аныгы үйэ ирдэбилинэн онлайн ыытан, 5 бастыҥнар истэригэр киирэммит кыттыыны ыллыбыт.  Хатастан, Тааттаттан, Амматтан бастыҥ норуот маастардарын үлэлэрин кытта күөн – күрэскэ кытынныбыт. Бу күрэскэ нэһилиэкпит уран тарбахтаахтара: СӨ норуотун маастардара Седалищева Ольга Егоровна, Петрова Августина Егоровна. Чурапчы улууһун норуотун маастардара Карамзина Мария Ильинична, Шестакова Тамара Семеновна. Одьулуун нэһилиэгин норуотун маастардара Михайлова Елена Николаевна, Дьячковская Наталья Кенчеровна уонна да атын бастыҥтан бастыҥ маастардарбыт үлэлэрэ турдулар.

Күөн – күрэс түмүгүнэн, I ҮРДЭЛ кыайыы өрөгөйүн билэммит аны саас, муус устар 30 күнүттэн, ыам ыйын 4 күнүгэр диэри дойдубут тэбэр сүрэҕэр МОСКУБАҔА ыытыллар,  Международнай «СОКРОВИЩА СЕВЕРА. МАСТЕРА И ХУДОЖНИКИ» конкурс – быыстапкаҕа кыттар чиэскэ тигистибит.

Кыттыыны ылбыт маастардарбытыгар барҕа махтал! Улууспут, нэһилиэкпит чиэһин көмүскүү «Иэйэхситтэр» Москваҕа барарга бэлэмнэнэллэр. 

2005 сыллаахха сэтинньи 25 күнүгэр, ЮНЕСКО олоҥхону аан дойду култууратын биир саамай чаҕылхай шедеврынан биллэрбитэ. Олоҥхо - Саха омук былыыр-былыргы дьыллар быыстарыттан сырдык уонна хараҥа, айыы уонна абааһы аймахтара утарыта турууларын, күрсүүлэрин туһунан уостан уоска бэриллэн кэлбит уус-уран айымньыта. Киһи өркөн өйүн, күүһүн күдэҕин кыаҕынан, айыы аймаҕын күөмчүттэн көмүскүүр үрдүк аналын хоһуйар.

Бүгүн о.э Сэтинньи 27 күнүгэр, Т.Г. Тоскин аат. «Сайдыс» НАДь СӨ XVII-c төгүлүн Аммаҕа ыһыллыбыт ыһыахха «Эмис түмэппий курдук этэн дьэргэлдьиттэхпинэ» олоҥхону толорооччулар күөн – күрэстэрин КЫЛААН ЧЫПЧААЛ кыайыылааҕа, Өрөспүүбүлүкэтээҕи «Уруйдан улуу олоҥхо» күөн – күрэһин хас да төгүллээх кыайыылааҕа, алгысчыт, олоҥхону толорооччу, Мырыла нэһилиэгин олохтооҕо ХРИСТОФОРОВ АНАТОЛИЙ НИКОЛАЕВИЧ кэлэн, Одьулуун нэһилиэгин олохтоохторугар оллоонноон олорон, Былатыан Ойуунускай «Дьулуруйар Ньургун Боотур» олоҥхотун иһитиннэрдэ.